Tomwatar ma ramin nus Yamdena Timur ye ± 70.000 (fafa tomwate ribun but itw). Tomwatar ye ma ramin mpane pnuar na nus Yamdena timur ma pnue lese na yampren Selaru. Sir ye ma rpaki Timur Liriny. Pnuar ye ramin mpane kecamatan fir a ne far Arma, Watmuri, Manglusi, Tutukembong, ma Waturu na kecamatan Nirun Mas; Lumasebu, Kilmasa, Meyano Das, Meyano Bab, Alusi Krawain, Alusi Kelan, Alusi Bukjalim, Alusi Tamrian, Alusi Batjasi ma Lorwembun na kecamatan Kormomolin; Amdasa, Arui Bab, Arui Das, Sangliat Krawain, Sangliat Dol, Atubul Dol, Atubul Da, Lorulung, ma Tumbur na kecamatan Wertamrian; Wowonda, Ilngei, Kabiarat, Lauran, Olilit, Sifnana, Bomaki, Lermatan ma tomwatar ketnir na Latdalam na kecamatan Tanimbar Selatan ma pnu Adaut na kecamatan Selaru. Tomwate fafa ribun but itw ma rfalak na das a ne. Iane to trekan sir a tafal ma ramin kote silayar na Indonesia ni kateman a fuky.
Na ngarak 1987 (ribun but siu rat wal resin itw) tomwat sa nof Swiss ngarany Toni Mettler. I nma ma nsalan fen ngamone Timur Liriny. I nkarya nor Universitas Patimura (UNPATI) ma Summer Institute of Lingusitic (SIL), I nkarya nbal nor Departemen Sosial RI, SIL ma Yayasan Mitra Mandiri. Sir raktem a rkarya nema nal far lury e tomwatar ma ramin pnuar a ne rtafal ma ralele Ratu ma nir momorip nangafel a nlengan nof luryain.
Na ngarak 1987 (ribun but siu rat wal resin itw) ntabw ma terjemakan Kitab Lelerap ye na Timur Liriny lo. Tomwtar ma rterjemakan Timur Lirin ye sir a ne: Bapak Silvinus Lamere, Bapak Norbertus Unawekla, Bapak Antonius Ungirwalu, Bapak Silvester Rangkadu ma Ibu Rika Kelitadan.
Yayasan Pemberdayaan Masyarak Desa (YPMD) rafdiri na Kabupaten Kepulauan Tanimbar ye la rtulung penerjemahan Kitap Lelerap na liliryar na Tanempar. Ma tim Timur Liriny ye namin YPMD. Tim ye nir karyae e rterjemahkan Kitap Lelerap, bahan-bahan Rohani ma bahan-bahan Literasi na Timur Liriny. YPMD nkarya nor Kartidaya Sahabat Indonesia ma ral tomwatar sa nof Kartidaya ngarany nona June Rumthe. I ye ma neluk fasilitator la ntulung tim ma raktem a rkaya ma rterjemakan Kitap Lelerap ntabw nof ngarak 2007 (ribun du resin itw). Nona June Rumthe ye nkarya nor tomwatar tel ma reluk tim Timur Liriny. Sir a ne Ibu Agustina Olinger, Ibu Yosefa Luturyali ma Ibu Katarina Matruty. Mpe tim ye ma raloran ma rterjemahkan Kitap Yoyoding Beberi na Timur Liriny terik ma omp. Kitab Yoyoding Beberi na Timur Liriny ma racetak a ne sesedin ma namin lo. Ma rnau na Fesbook, Instagram ma You tube mpa bise ma msyalan myof situs ye.
Kaweni Ratu Ni Ngribatnir ma rose na Timur Liriny ye la nberkat tomwat Yamdenar nema na nir momorip lerar e rtafal ma rkaul ral Ratu Ni Ngribatnir na nir liliri./hds
